Recordã sã vivê

Iou têm na Macau na ano 2013, mês di Junho, quente di morrê, j’ólã resgate di bote di dragão já comê catupá, bom! Qui cuza más fazê ia?!

Logo vêm procissão di Santo António, agora Macau somente têm istunga procissão na domingo qui segui dia 13 di Junho, iou lembrá quelóra procissão vâi rua andâ unga volta  grándi, sâi di gréza passá na dianteira di Jardim di Camões, logo chegá na vanda trás di Hospital Kiang Wu, subí Rua D. Belchior Carneiro, vêm na lado de S. Paulo, decê pa básso intrá na rua úndi têm o famoso Cheong Lau e lôgo vêm di volta pa gréza.

Gréza di Stº António

Agora procissão di Santo António andá somente na adro di gréza, sâi pa rua dá volta na chafarí qui têm na porta di gréza vâi pa porta di jardim Camões lôgo vêm Gréza.

Procissão já cavá, logo têm festa di Ná Tchá, iou têm quasi sessenta áno, nunca ólá pa istunga festa, assí iou azinha recorda na tempo di iou quiança, iou co iou sa irmão já vâi explicação co professora Ermelinda Baptista qui têm su casa na Si Sáng, já vâi casa di professora pa aprendê unchinho más na féria di verão, já subi na Calçada das Verdades, subí vêm subí vâi, j’ ólã unga pagóde suzo suzo, qui sábi cuza sã, subí unchinho más já têm más unga pagóde más grándi, tamên qui sábi cuza sã, j’ólã gente queimá pivete, batê cabéça, rónça rónça já têm na casa di professora, intrá casa lôgo ólã têm más quiança, tamêm têm quánto cachoro rabusénga, ui di medo co cachoro.

Si passá na vanda trás di Hospital S. Rafael e galgá Calçada di Monte pa vâi explicaçám, lôgo passá na frente di casa di Família Fernandes, decê unchinho pa básso vira vâi direita subí riva lôgo chegá casa di professora.
Vâi tudo dia pa explicação piguntá vâi piguntá vêm já achá cuza sã istunga dôs pagóde, sã pagóde di Ná Tchá.
Tudo dia vâi casa di professora já engraçá co cachoro cachoro, nádi medo já brincá co l’otro, já ólã ancuza qui sã novidade pa iou, cachoro cachoro têm carapata (caráças), grándi, di cor cinzento, gordo qui gordo, matá pa ele já fazê tudo suzo di sangue, más pichotito têm cor castanho, carapata pichote têm ui di tánto pata, corrê ui di azinha, carapata grándi e gordo sã nom pódi mexê, sã andá vagar qui vagar, ui di morrúm.

Iou na Macau iou vâi tudo mês pa Siviço di Turismo busca jornal ou pódi chomá boletim, têm tudo actividade di nosotro sa terra, têm iscrivido tudo festa festa, exposiçám co tudo lenga lenga qui vâi fazê na Macau, istunga jornal têm somente na lingu inglês e china. 
Iou já pegá na istunga jornal, já ólã di riva pa basso e basso pa riva, já virá página, pegá caneta atómica rabiscá tudo ancuza qui iou querê ólã.
Chegá dia di festa di Ná Tchá, iou lôgo corrê vâi S. Paulo qui têm na su lado unga pagóde di Ná Tchá, logar úndi fazê festa, ólã quánto mesa mesa pa almoço e jantar di festa di l’otro.

Andã vâi pa aqui ali vanda ólã pa ladeira, têm tánto bandeira bandeira qui l’otro já chuchú na chám, lôgo pódi imagimá qui festança lôgo vêm di istunga vanda ia.

Esperá unchinho assi tánto já uví ti ti tá tá tulum ting ting, ólã vâi básso já ólã bonzo (sercedote budista) e tou si ( sercedote taoista) já vêm di ladeira em procissão di básso pa riva, chegá riva vâi pa altar qui já têm fóra di pagóde, já começá cerimónia co reza, lôgo têm almoço e jantarada.

Cartáz di Ná Tchá juntado co S. Paulo

(Clicar para ver vídeo) - Sarcedotes dão início às cerimónias

Somente gente convidado pódi intrá pa ólã cerimónia, más bom sã dessá iou vâi ia, ronçá ronçá di iscadaria di S. Paulo pa básso, têm tánto gente, já recorda qui na básso di iscadaria juntado co casarám grándi, antigamente têm tenda tenda qui vendê ancuza pa turista turista, tudo tenda tenda já zapareçê ia, casarám já ficá unga loja grándi co restaurante português, sala di conferência qui iou já sentá e uvi cuza já contá.

Casarám qui iou já papiá

Pramicedo têm procissão desfile di Ná Tchá, istunga divindade non católico sã terçeiro filo di Imperador di Céu di Léste, unga dia já brincá na Mar di Léste já fazê mar ficá tudo ravirado qui ramendá tufão, filo di Imperador di Mar de Léste já vêm bispa cusa sucedê pa mar ficá tudo ravirado, ólã sã Ná Tchá qui fazê, chomá tenção pa istunga pa pará, isntuga nádi pará, dôs já bulí, jugá soco, Ná Tchá di sete ano já matá filo di Imperador Dragão di Mar. 
Imperador Dragão réva j’vâi pa Céu busca pápi di Ná Tchá e contá cuza já sucedê, pápi de Ná Tchá réva já matá su filo, péga corta ele sete pedaço assi tánto, su mãi já cubri co fólia de lotus pa corpo di su filo morto já fazê ressuscitá.
Fála qui istunga divindade sã bom pa fazê fuzí espírito mau, ladrám e qui sábi cuza más.
Procissão desfile já começá, dessá iou botá unga vídeo.

(Clicar para ver vídeo) - Ná Tchá chôt vui (procissão desfile)

Quiança qui pódi ólã na vídeo qui vestí roupa fólia e fula di lótus co lança na mán sã representá Ná Tchá qui tamêm sã conhecido di Sám Thai Chi.

Iou somente iscrevê cuza lembrâ di história di ná Tchá qui vizinhança contá pa su filo fila na tempo di iou quiança qui tamêm úvi. 

(Clicar para ver vídeo) - Ná Tchá Tán, andores, divindades e Tou Si

Andores, Divindades, Tou Si já travessá Avenida Almeida Ribeiro, Dragão bulí su corpo, Ku Sau na riva di carroça qui su colega colega puxá, xáxá (pratos) ló (gongo) leões e kei lon juntado tudo bulí bulí, barulo qui nom pódi más.

(Clicar para ver vídeo) - Chôt Vui di ná Tchá já travessá Avenida Almeida Ribeiro (San Má Lou)

Chôt Vui (procissão desfile) já chegá fim na Largo de Senado, dragão já ficá enrolado e quiança vestido de Ná Tchá tomá logar pa fotografia.

Dragão enrolado e Ná Tchá ao vivo

Texto, fotos e vídeos de Filipe Rosário