José dos Santos Ferreira

UNGA POÉMA, IOU-SUA AMOR Di tanto, tanto qui vôs merecê, Macau quirido, Iou já dá pa vôs Quelê pôco, cási nada. Di tanto qui já panhá di vôs, Macau abençoado, Iou já dá pa vôs Unchinho na-más, cási nada. Vôs são iou-sua berço, Semprei, sempre, Razám dii ou-sua vaidade. Na ora di rezá térço, Sempri, sempre, Iou lembrá vôs co humildade. Iou-sua filiz infância. Escola pa iou prendê ancuza, Campal, lugar pa brincá; Porçolana di arôz di tudo dia, Liçám di hónra, Macai dii ou-sua coraçám, Tudo vôs já dá pa iou. Vôs sã iou-sua altar, Sempri, sempri, Razám dii ou-sua fé cristám. Vôs têm tudo lugar, Sempri,sempre, Na iou-sua coraçám.

Pramor di vosso crença, Iou têm iou-sua religiám Pa sirví Dios co fervor, Pa prendê dotrina qui Su Filo Já vêm Mundo prega; Macau cristám, Si iou-sua alma mer’cê salvaçám, Sã vôs iou têm-qui gardecê. Unga Pátria inchido di glória, Passado fêto co bravura, Co estória qui mundo inveza. Unga bandéra respetado, Unga língu burifado di beleza, Macau português, Tudo vôs já dá pa iou. Di tanto, tanto qui vôs merecê, Di tudo qui iou já panhá, Io upa vôs, Macau quirido, Qui-cuza já dá? - Unga poéma, Iou-sua amor! Qui-cuza más? 5 di Janéro di 1985

1980s - foto de Macau Old Photos Facebook