Uvi, iou vem contá unga istória pa vosotro tudo.
Ano passado iou já ficá doente chomá 112 cartá vai hospital.
Acunga hospital inchido que inchido, nôm tem vanda pa bota iou. Cavá unga bombeiro já leva iou pa unga quarto, quelora iou já ficá onçom onçom nunga canto.
Iou ta doente, ôlo fichado, mas pódi uvi bem feto unga bombero falá pa otro:
- É pá, aqui não!
Acunga otro já respondê:
- Não faz mal, não está cá ninguém!
Cavá, azinha azinha dôs bombero já vai fora-ia.
Iou, chuchumeca, virá iou-ça ôlo olá onde elotro já largá iou. Sã unga quarto com dôs cama di pedra!
Cavá quanto hora passado, acunga dôs bombero já volta, cartá unga sium di cara tapado, botá nunga cama di pedra, logo falá pa iou:
- A Sra. está com sorte, já temos uma vaga para si no 1º andar.
Iou qui-da mêde. Acunga dôs mufino já pinchá iou na quarto di morto!
Julia Gordo
Sem comentários:
Enviar um comentário