PCB Magazine: Ano di Dragão na Macau

Ano di Dragão na Macau

Qui bom pódi vai pa rua queima panchão drêto nestunga Ano di Dragão. Quinze ano fóra na Saiong nádi tem estunga brincadera, divéra senti saudadi destunga pom-pom-pom. Agora ta intra idade, lembrâ quelora quiança, tudo genti vai cêdo-cêdo na rua con rôpa chistosa, pa apanhá laisi di tudo vizinhança qui passa.

Uvi, vem con iou cantarôla unchinho: KUNG HEI FAT CHOI, LAI SI TAU LOI, TAU LENG NG OI, SAP MAN LENG LOI.

Com laisi na man, jâ vai corrê rua, nóm sábi voltâ, cavá chegâ casa quasi escuricê. Ferado-ia, castigo san amanha isfregâ cham di casa até estonteá. San assi-ia, tudo ano san mesmo estoria, nádi aprendê liçam.Hoze tanto china-china di continente ta vem pa Ou-Mun, impurra-vem impurra-vai, nom tem chiste. Iou axa más bon san iscondê na casa, né bom vai rua pa dessa genti pisa nosotro sa pé. Primeiro dia Ano Novo ta vai comê fora con tudo família, senti uidi tufão, comida nádi vem e tudo genti ansiado gurunhâ, chôma fó-kei qui jâ inscondi na cozinha.

Tudo maquista corrê vai casino, falâ vai tenta sorti grandi e lôgo voltâ murúm qui murúm .. jâ perdê tudo sapéca. Cuza sucedê? Bôta culpa na bonzo qui olâ na San Ma Lou, sãn gato preto qui atravessâ na rua, sãn calça qui pendura di basso di varanda… uidi tanto estoria Dessa vai-ia, bom olâ tudo amigu maquista contenti con saúde e sapéca no bolso pa gastâ.

Macau quelora pichote qui pichote já virâ genti grande … somente 16 km2 jâ crecê até 29.

Nunca bom isquecê-ia, otro ano vem Encontro!´