CHISTENom tem chiste papiá boboriça
Nom tem chiste uví parabiça
Nom tem chiste olá arvirice ...
Si vôs-sa alma sâm fichado.
Mas cuza sâm chiste ?
Sâm ancuza qui vêm di nôsso coraçám
Quelóra nôs tem pensám
Pa nádi ficá más triste
Fazê chiste sã ri pa nádi churá
Sâm florecê pa nádi murchá
Sâm olá mundo medonho
Co ôlo risonho
Assi, quím têm chiste
Nunca mêdo vida fêde,
Nádi falá “qui ramêde !”
Boboriça, parabiça co quánto arvirice...
Tudo ancuza sâm más dóci.
Miguel Senna Fernandes (1994)
Sem comentários:
Enviar um comentário