Recordâ sã vivê

         Divera sã, recordâ Sã vivê, tudo ancuza qui nosôtro já ôlá na tempo de quiança de cinco dez ano sã nádi isquecê, iou sentí qui permanecê istunga lembránça qui chegâ dia de morrê.

       Quelóra iou pequeno tem  vivo na bairro S. Lázaro,  Rua S. Miguel 19A, istunga vez sómente tem lembránça, casa velo, casa de iou sa avó, mãi de iou sa pápi, qui tem nóme Josefina, co alcunha de “I Châi”, capaz  fazê comida, bolo, tudo comizaina macaísta, edifício já non tem, somente tem unga foto de iou sa mamá colo iou na porta de casa, bom, dessá iou bota istunga foto aqui, otro foto sã ancuza qui agora tem, casa véla qui iou tem vivo na tempo de quiança agora sã unga edifício de cor verde já vélo.

       Iou tem vivo na Rua S.Miguel de nascê até seis anos, lôgo já mudâ vâi Mong Há, frente de cemitério Nossa Senhora de Piedade que já ficá nove mês assi tánto.

       Dessá iou cavá iou sa báfo de áde, contá cuza iou já olá quelóra quiança na istunga vanda de S. Lázaro, iou non tem fotografia antigu de Rua Eduardo Marques co Rua S. Miguel juntado, si vosotro querê olá pode vâi facebook “Antigas Fotos de Macau” bispa unchinho, somente tem qui gavatá três mil foto fora, iou sábi qui tem unga foto ui de bonito de istunga dôs rua.

       Na istunga foto únde tem edifício novo co letra china, na tempo antigu sã terreno qui tem somente pedra e erva, tudo dia de tarde tem pastor qui trazê ui de tánto cabra para comê erva, depois de comê, cabra descê de Rua Eduardo Marques e vâi embora na Calçada de Igreja S. Lázaro, dôs três cabra chegá porta de casa únde iou tem vivo, azinha vêm pastor chomá, lôgo animal ta vâi co ele ia.

       Iou sa titi Nanda depois de casá já vêm vivê co su marido na Rua Eduardo Marques frente de terreno qui cabra vâi comê.

       Descê unchinho assi tánto logo têm asilo de Misericórida de Santa Casa, gente qui chomá “Pó Chai Nhoc” qui também chomá na jornal “Old Ladies House”, istunga ficá na Calçada da Igreja de S.Lázaro.

       Na frente de asilo tem vivo Alice Rosário co su gente, Luísa Canavaro co su família, família Fazenda.

       Na Rua S. Miguel quelóra tem vivo quánto família macaísta, sã iou co iou sa gente, família Rocha, família Rosa, família Eusébio, más têm mãi de dôs padre, Kou Páck Choi co su família, um poliça co su família qui sábi qui nóme tem e mais china china.

       Iou pequeno nádi pódi sâi de casa, somente pódi brinca na varanda e quintal, bom na varanda quelóra tem tanto ancuza pa ôlá.

       Pramicedo vem padéro grita min pao, iou tem na lembrança istunga padéro china vélô công, curvado co sandália de sóla fino qui parecê papel amarrado co corda, quasi descalço já trazê pão e bolo de Volong.

       Quelora tudo gente guelá na janela ou varanda pa comprá ancuza, sã min pau, chü cheong fan, non sábi cuza más ia, china coitado, azinha corrê pa tudo vanda atendê tudo su freguês qui querê comê ante de vaî trabala, quiança quiança ta vâi iscóla.

       Tánto gente co cesto pindurado na janela, china bota ancuza qui l’ otro querê, péga na dinheiro qui já tem na cesto, lôgo chega ancuza qui querê, azinha pussá cesto vai riva.

       Min pau pichotito sã cinco avo cada, grándi são 10 avo, bolo bolo, má chai, tán sán sã 10/20 avo um.

       Sã dôs padéro qui vem vendê na bairro S. Lázaro, sã de Volong e ká Lán.

Na tempo antigu, gente tem sórti, comê ancuza fresco e bom, qui já fazê na hora, agora nosotro pódi papiá qui nosôtro tamêm comê ancuza fresco, somente nádi papiá qui sã gelado.

       China china ui di capaz trazê su ancuza pa vendê, sã tem gente cartá co pau qui sã tám cón co dôs cesto pindurado, tem gente botá armário, tem gente empurra carro de madeira co su montra, tamêm tem gente botá na cabeça riva, si vosôtro querê ólá, vaî pa nosôtro sa site (www.gentedemacau.com) gavatá unchinho, iou tem chapa botado com nóme de  “Simulação de Macau Antigu”, fotografia de áno 2003 e 2004 de bairro S. Lázaro qui china fazê festa pa recordaçám de tempo antigu e fazê vêm turista.

       Más tem china vendê galinha co áde, canja de chai ü, fruta, bredo de tudo laia, tau fu fá, mag ngá tóng, tén tén tóng, china gordo empura carroça co montra ta vendê ancuza de quinquilharia, iao ü , tau fu kóc fritado, canja dóci de feijão vermelo, chi má vu, aia! Iou já vem na iou cabéça, nosôtro sa querido cháchá, qui Juju co su mãi já fazê pa nosôtro sa festa já matá saudádi, tem tánto ancuza pa vendê, sün kéon co tudo laia laia.

       Quiança quiança brinca na rua, juga espada, senta bicicleta, juga chiquía, juga moeda, e tánto ancuza.

       Chega seis sete hora  tem ancuza triste, vem china pobre pedí, nádi pedí sapeca, sã pedí comida, batê porta de tudo gente, comida qui já ficá azedo tamêm querê, sentá na rua comê cuza já conseguí.

       Noite ta vêm, tórna têm ancuza vendê, vem jornal china qui atira riva na casa de gente, fei kei lám, caranguejo, catupá e Kau kei (Sorvegel) vendê su sorvete.

       Chega festa de bolo-bate-pau, vem quiança quiança juntado co su coelho de papel com candia cendido, vem de riva Rua Eduardo Marques pa básso, iou non sábi únde lotro ta vâi, iou nádi pódi sâi de casa.

       Istunga rua sã de calçada portuguesa, tudo de pedra pedra, si coelho virá câi, logo queimá, tem quiança goelá e chorá.

       Iou já papiá dia intéro bairro S. Lázaro, para quim nádi conhecê como pódi sábi como sã istunga bairro?, para gente qui sabi mata unchinho  saudádi si tem vivo fóra de Macau, assi más bom sã dessá iou botá dôs foto aqui.

       Bom, foto de calçada têm unga prédio antigu co torre, sã iscola Kung Kal, iscola católica, na lado de istunga iscola prédio vélo sã Rua Nova S. Lázaro, iou tamêm tem vivo na istunga rua, vosotro póde bispa na foto.

       Ancuza qui já sucedê na istunga vanda iou contá na edição de magazine qui torná vêm. 

       Istunga fotografia sã Rua Eduardo Marques co Rua S. Miguel juntado, já chegá depois de iou sa iscrita cavá ia, sã iou sa irmão Frederico Rosário qui batê istunga chapa pa iou.

Texto e fotografias de: Filipe Rosário

Fotografia de Rua Eduardo Marques e Rua S. Miguel, juntos de: Frederico Rosário